काठमाडौं साउन। सामाजिक सुरक्षा कोषले आर्थिक वर्ष २०८३/८४ का लागि निर्धारण गरेको नयाँ ब्याजदर आजदेखि लागू भएको छ।
कोष सञ्चालक समितिको असार २३ गते बसेको बैठकले गरेको निर्णयअनुसार आजदेखि लागू हुने गरी योगदान रकममा प्रदान गरिने ब्याज तथा विभिन्न प्रकारका सापटीमा लाग्ने ब्याजदर निर्धारण गरिएको हो।नयाँ व्यवस्थाअनुसार वृद्धावस्था सुरक्षा योजना तथा संस्थागत एवं व्यक्तिगत अवकाश कोषमा जम्मा भएको रकममा वार्षिक ३.२ प्रतिशत ब्याज प्रदान गरिनेछ।त्यस्तै, विशेष सापटीमा कोषले वार्षिक ४.७ प्रतिशत ब्याज लिनेछ भने घर सापटी, शैक्षिक सापटी र सामाजिक कार्य सापटीमा वार्षिक ५.५ प्रतिशत ब्याजदर कायम गरिएको छ। घडेरी सापटीमा वार्षिक ५.७ प्रतिशत ब्याज लाग्नेछ।
यसैगरी, ईएमआई भुक्तानीको म्याद नाघेमा वार्षिक १ प्रतिशतका दरले हर्जाना ब्याज लाग्ने सामाजिक सुरक्षा कोषले जनाएको छ।
