डोटी जेठ २३(ई–रैवार)
सुदूरपश्चिम प्रदेशमा पाँचदिनसम्म पीसीआर परीक्षणका लागि ‘थ्रोट स्वाव’ संकलन नगर्न निर्देशन गरिएको छ । सुदूरपश्चिम प्रदेश स्वास्थ्य निर्देशनालय राजपुर दिपायलले शुक्रबार एक सूचना जारी गर्दै पाँचदिनसम्म थप थ्रोट स्वाव नलिन मातहतका निकायहरुलाई निर्देशन गरेको हो ।
निर्देशक डा. गुणराज अवस्थीद्वारा हस्ताक्षरित पत्रमा सुदूरपश्चिम प्रदेशमा हाल एउटामात्रै ‘आरटीपीसीआर’ प्रयोगशाला रहेको र जसको दैनिक जाँच क्षमता दुईसय ५० नमुना मात्रै रहेको उल्लेख गर्दै एक हजार ८३ जनाको स्वाब परीक्षण गर्न बाँकी रहेको उल्लेख छ ।
‘यसरी नै दैनिक स्वाब संकलन भईरहने हो भने, परीक्षण गर्नुपर्ने स्वाब धेरैदिन थन्किनसक्ने भएकाले र धेरैदिनसम्म परीक्षण नगरी स्वाब राखेमा बिग्रने पनि सम्भावना भएकाले आजको मितिदेखी पाँचदिनसम्म कोभिड–१९को स्वाब नगर्न’ भनी सूचनामा उल्लेख गरिएको छ ।
