एजेण्डामा प्रवेश नगरी सकियो कांग्रेस बैठक

काठमाडौं, मंसिर २९(ई-रैवार)
आइतबार दिउँसो १ बजेका लागि बोलाइएको बैठक अपरान्ह ३ बजेपछि सुरू भए पनि मुख्य एजेन्डामा प्रवेश गरेन।
गत बिहीबार सभापति शेरबहादुर देउवाले २८ विभाग बढाएर ४१ पुर्‍याउने र विभागलाई पूर्णता दिने लगायत ९ एजेन्डा पेश गरेका थिए।
ती एजेन्डामाथि छलफलका लागि बसेको बैठक एजेन्डामा प्रवेश नै नगरी सोमबार दिउँसो १ बजेसम्मका लागि स्थगित गरिएको छ।
बैठकपछि मुख्यसचिव कृष्णप्रसाद पौडेलले सहमति जुटाएर सोमबार फेरि बैठक बस्ने जानकारी दिए। ‘केहीबेर बसेर आजका लागि बैठक टुंगियो, भोलि दिउँसो १ बजे फेरि बस्छ,’ उनले भने।
बरिष्ठ नेता रामचन्द्र पौडेललगायत उनीपक्षका केन्द्रीय सदस्य सरिक नभएपछि बैठक मुख्य एजेन्डामा प्रवेश गरेको थिएन। पौडेल पाथीभरा दर्शनका लागि गएका छन्।