बैतडी मंसिर २६(ई–रैवार)
निर्माणकार्य सकिने समयावधि सकिएको १६ महिनापछि बैतडीको पाटन विमानस्थल कालोपत्रेको काम शुरु भएको छ । सम्झौता अनुसार विसं २०७५ को असारमा कालोपत्र गरिसक्ने लक्ष्य थियो ।
ग्याल्वा च्यामलिङ्गा जगदम्बा जेभीले यो विमानस्थल कालोपत्रेको काम पाएको छ । जसले निकै लामोसमय लापरबाही गरेका कारण हालसम्म कालोपत्रेको शुरुवात समेत भएको थिएन् ।
निर्माण शुरुभएपछि अबका २० दिनमै काम सकिने निर्माण कम्पनी इञ्जिनीयर पुरन रावलले बताए । ‘वर्षा नभई मौसमले साथ दिए २० दिनभित्रै काम सम्पन्न हुन्छ,’ उनले भने ।
विमानस्थल कालोपत्रपश्चात् अन्य संरचना बनाउन अझै समय लाग्नेछ । विमानस्थलको ५ सय ९० मिटर लम्बाइ र २० मिटर चौडाइ ‘रन–वे’ कालोपत्र गरिनेछ भने ७० मिटर लम्बाइ र ३० मिटर चौडाइको एप्रोन कालोपत्र गरिनेछ । यसका लागि करीब मूल्य अभिवृद्धि करबाहेक रु ११ करोड २९ लाखको लागतमा काम भइरहेको छ ।
निर्माण सकिने भनिएको १६ महिनापछि काम शुरु
