काठमाडौँ, साउन १३ (ई–रैवार)
जनता समाजवादी पार्टी (जसपा) नेपालको केन्द्रीय कार्यकारिणी समितिको बैठक आज बस्ने भएको छ । जसपाको केन्द्रीय कार्यालय बालकुमारीमा दिउँसो १ बजे बस्ने बैठक बस्न लागेको हो ।
जसपा नेता मोहम्मद इस्तियाक राईले दिउँसो १ बजे पार्टी केन्द्रीय कार्यालय बालकुमारीमा बस्ने बैठकले नेता महन्थ ठाकुरहित १६ जनालाई कार्यकारिणी समितिबाट हटाउने तयारी भएको बताएका छन् ।
अध्यक्ष उपेन्द्र यादव पक्षले पार्टीको आधिकारिकता पाएसँगै यसअघि कार्यकारिणी समितिमा रहेका नेताहरुलाई हटाउन लागिएको हो ।यससँगै जसपाको कार्यकारिणी समिति ३४ सदस्यीय हुनेछ ।
पार्टीको आधिकारिकताका लागि निर्वाचन आयोगले बहुमत सदस्यको सनाखत गर्दा रेशम चौधरी भने तटस्थ बसेका थिए । उनलाई भने कारबाही नगरिने बताइएको छ ।
हिजो जसपाको कार्यकारिणी समितिको अनौपचारिक बैठक बसेको थियो । बैठकमा नेताहरुलाई हटाउने विषयमा छलफल भएको र आज औपचारिक निर्णय हुने नेता इस्तियाकले जानकारी दिए ।
त्यस्तै, सांसद पदमा रहेकाहरुलाई भने पार्टीमा रहने/नरहने टुंगो लगाउनका लागि केही समय दिने तयारी छ । उनीहरुलाई स्पष्टीकरण सोध्ने तयारी भएको बताइएको छ ।
