काठमाडौं, भदौ ६ (ई-रैवार)
सत्तारुढ नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालका ९ जना सुरक्षाकर्मीमा कोरोना संक्रमण पुष्टि भएको छ । पूर्वप्रधानमन्त्री तथा नेकपाका वरिष्ठ नेताको सुरक्षामा खटिएका पी एस ओसहित ९ जना प्रहरीमा कोरोना भाइरसको सङ्क्रमण पुष्टि भएको हो ।
३५ जनाको स्वाब संकलन गरिएकोमा नेता नेपालका पीएसओसहित ९ जनामा सङ्क्रमण पुष्टि भएको उनको निजी सचिवालयले जनाएको छ । नेता नेपाल र उनका अरु परिवारका सदस्यको रिपोर्ट भने नेगेटिभ आएको छ ।
बिहीबार पूर्वप्रधानमन्त्री नेपाल, उनको परिवार, उनको सुरक्षामा खटिएका सुरक्षकर्मीसहित निवासमा रहेका ३५ जनाको स्वाब संकलन गरिएको थियो । सङ्क्रमण देखिएका सबैलाई शुक्रबार राति नै आइसोलेशनमा पठाइसकिएको सचिवालयले जनाएको छ ।
