मोदी–सी बैठकको भित्रीकथा

मोदी–सी बैठकको भित्रीकथा

यो हप्ता भूराजनीतिक बैठकहरुका लागि व्यस्त रह्यो । पश्चिमा नेताहरु वासिङटनमा व्यस्त रहे भने कोरियाली नेताहरु गैरसैनिककरण गरिएको क्षेत्रमा आमनेसामने भए । यता, भारतीय प्रधानमन्त्री नरेन्द्र मोदी चिनियाँ राष्ट्रपति सी जिनपिङसँगको दुई दिने ‘अनौपचारिक सम्मेलन’ का लागि चीनको वुहान प्रान्तमा पुगे । विश्वको शक्तिकेन्द्रको परिधीमा रहँदै आएका यी दुई छिमेकी राष्ट्र केन्द्रविन्दुमा स्थानान्तरण हुँदै गर्दा यो बैठकमा धेरैको चाँसो थियो ।

सम्मेलनको परिणाम

सम्मेलनपछि भविष्यमा दोक्लममा भएको जस्तो गतिरोध आउन नदिन र सीमामा तनाव घटाउन सी र मोदीले आफ्ना सेनाहरुलाई ‘रणनैतिक निर्देशिका’ जारी गरेका छन् । यसका लागि उनीहरुले सीमामा तैनाथ आफ्ना सेनाहरुलाई सीमाको मामिलामा ‘प्रभावकारी र स्थीर’ व्यवहार गर्न भनेका छन् ।

“दुई नेताहरुले भारत–चीनको विशाल सीमा क्षेत्रमा शान्ति र सदभाव कायम राख्नुको समग्र द्विपक्षिय सम्बन्धको विकासमा पर्ने असर बुझेका छन्,” मोदी–सी अनौपचारिक वार्तापछि जारी भारतीय वक्तव्यमा भनिएको छ ।

सीमाना विवाद र सैन्य तनावबारे एक लामो हरफमा दुई नेताहरुले ‘सीमानाको विषयमा’ काम गरिरहेका भारत र चीनका विशेष प्रतिनिधिहरुलाई ‘स्वच्छ, तर्कपूर्ण र दुबैले स्वीकार्न सकिने’ समझदारी खोज्नको लागि गम्भिर प्रयास गर्न भनिएको छ ।